s Priedi dad uestg Pieder Bürcher ella celebraziun eucaristica a caschun dil pelegrinadi digl uestgiu a Nossadunnaun ils 26 d'october 2019 | Bistum Chur
Navi Button
Bistum Chur

Priedi dad uestg Pieder Bürcher ella celebraziun eucaristica a caschun dil pelegrinadi digl uestgiu a Nossadunnaun ils 26 d’october 2019

“Battegiaus e tarmess”

Il pli bi di en mia veta ei quel dil Batten staus! Dus dis suenter mia naschientscha e treis dis avon Nadal sun jeu vegnius battegiaus „enten num dil Bab e dil Fegl e dil Spert sogn.” Igl ei stau ils 22 da december 1945 ella baselgia parochiala da s. Gion Battesta a Fiesch! Quei di ein sesaviartas per mei sco per tuts nievbattegiai las portas dil parvis!

Tier la celebraziun dil Batten damonda aunc oz il spiritual ni il diacon il geniturs: “Cars geniturs, Vus leis che vies affon vegni battegiaus. Quei munta per vus: Vus duei educar vies affon ella cardientscha e mussar ad el da carezar Diu ed il proxim sco Jesus ha viviu ei. Vus dueis urar cun vies affon e gidar el d’anflar siu plaz ella cuminonza dalla Baselgia. Essas vus promts leutier?”

Dapi quei di da grazia era per mia famiglia e per mei indicada la direcziun treidimensiunala dalla veta: la cardientscha, la veta perpetna e la carezia el mintgadi. Pertgei jeu sun ussa battegiaus e tarmess per quella missiun!

Entschatta e finamira dalla veta cristiana vegnan celebradas el sacrament dil Batten: Aua ei vegnida derschida sur mei giu. Cheutras sun jeu vegnius purificaus e liberaus dils latschs dil puccau dalla carstgaunadad. Cheutras ha mia via cun la cuminonza ecclesiastica entschiet e quei entras suandar Jesus ed ir en direcziun dalla veta eterna!

Mes cars, dat ei enzatgei pli bi che in di che arva a nus la porta dil parvis e quei per adina, buca mo per quella veta terrestra, mobein per la veta eterna? Tgei grazia divina! Gia el 4. tschentaner ha sogn Gregori da Nazianz detg: “Il Batten ei il pli bi ed il pli magnific dun da Diu” (or. 40,3-4). A quella grazia dil Batten stoi jeu denton mintga di star fideivels! Dignitad, denton era buordi! Dignitad digl affon da Diu, denton era buordi dil puccont che astga denton adina quintar cun la immensa misericordia da siu Bab en tschiel!

“Battegiaus e tarmess” sun jeu!
“Battegiaus e tarmess” eis Ti!

Gie, sco jeu eis era Ti battegiaus e tarmess! “Crei el Segner Jesus, e ti vegns spindraus, ti e tia casada” di s. Paul a siu guardian dalla perschun a Flilippi. “Ed immediat eis el seschaus battegiar cun tut ils ses” (Fatgs 16,31.33).

Sche ti vuls emprender d’enconuscher enzatgi in tec meglier, lu damondas ti el forsa: “Cu eis ti naschius?” Da rar ni insumma mai damondas ti el: “Cu eis ti vegnius battegiaus?” E dil reminent: Sche ti has difficultads cun enzatgi, patratgas Ti lu vidlunder che quella persuna ei sco ti battegiada e ch’ella ei sco Ti in affon carezaus da Diu? Ei va cheu buca mo per la stema dalla persuna, mobein en emprema lingia per la stema d’ina persuna battegiada sco Ti! Sco affon da Diu eis Ti cun ella sin via viers il parvis! Quei ei nossa cardientscha! A Diu seigi engraziau persuenter!

Tiel Batten da Jesus entras Gion e Jordan han ins saviu udir ina vusch che ha tunau giu da tschiel: “Ti eis miu Fegl carezau, da tei hai jeu miu cumplascher” (Mc 1,9-11).

Quella vusch da Tiu Bab en tschiel resuna dapi il Batten era per Tei, emporta buca tgi che Ti eis. Teidla oz quella vusch buca mo cun Tias ureglias, mobein teidla ella el profund da tiu cor: “Ti eis miu fegl carezau, da tei hai jeu miu cumplascher”!

“Battegiaus e tarmess” eis Ti!
“Battegiai e tarmess” essan nus!

Mes cars, nus tuts giavischein in plaz en tschiel! Per saver survegnir el stuein nus esser pigns avon Diu e surschar l’iniziativa al “signur dalla fiasta”. Ei va per ver in cor affonil che retscheiva tut cun mauns vits, ella cardientscha viva ed ella carezia concreta dil mintgadi.

Il Batten ei la fontauna dalla nova veta en Cristus, ord la quala l’entira veta cristiana nescha. Perquei celebrescha la Baselgia mintg’onn ella vigelgia pascala la renovaziun dallas empermischuns da Batten. All’entschatta dalla messa hodierna vein era nus sco pievel da Diu astgau renovar la memoria da nies Batten.

Gie, mes cars, tgei munta quei? Cu la stauncladad vegn sur da nus, eis ei necessari da puspei destadar il dun che nus vein retschiert da Diu! Ussa eis ei forsa per entgins da nus veramein necessari da puspei destadar il dun dil Batten ch’ei sedurmentaus en nus, da surventscher la tema, da quintar cun la forza divina e d’acceptar detschartamein nossa part dil pitir, per saver annunziar igl evangeli cun legria. Quei ei era la finamira dil meins extraordinari dalla missiun mundiala sco era dil pelegrinadi marian da nies uestgiu da Cuera a Nossadunnaun. Igl ei nossa finamira sco pievel da Diu, dil qual ils commembers ein tuts battegiai e tarmess el mund hodiern. S. Paul di a Timoteus: “Miu fegl, jeu admoneschel tei: Fai reviver il fiug dalla grazia divina!”

“Conforta nossa cardientscha!” han ils apostels rugau il Segner; ei setracta buca mo da crer che Dieus exista, mobein da ver di per di fidonza en el. Ei setracta atgnamein dalla dinamica el ver senn dil plaid, la dynamis, q.v.d. la forza dil Spert Sogn che avda en nus dapi nies Batten. “Battegiai e tarmess” essan nus tuts! In carstgaun catolic ei buc in satellit: El ei in member dil tgierp da Cristus, pia dall’entira Baselgia catolica.

Dalla svizra Marguerite Bay ch’ei avon duas jamnas vegnida declarada sontga tras Papa Francestg vegn ei raquintau che la statua da Nossadunna cugl affon Jesus ella baselgia Notre Dame sper Siviriez hagi mirau a moda animada sin ella. Cu Marguerite hagi sefatg en quei hagi ella detg ad in conpelegrin: “Signur Richter, mo mirei con bein che nossa mumma manegia cun nus. Ella drezza ses egls sin nus!” Sco nus essan oz vegni ord igl uestgiu da Cuera tier Nossadunna, aschia ei era Marguerite pelegrinada pliras gadas a pei a Nossadunnaun. En sia zun sempla veta ei ella stada mintga di fideivla alla grazia dil Batten. Cun ella lein nus oz danovamein saver che nus essan tarmess da Diu e restar sco battegiai fideivels a nossa missiun!

Mes cars, alla fin less jeu aunc far attents sil suandont: Suenter nossa celebraziun vegn in e scadina da nus a retscheiver in guoter cun aua benedida ed in rusari. L’aua benedida vegn dalla claustra dominicana S. Peter am Bach a Schwyz e dil pli vegl edifeci cristian dalla Svizra a Riva San Vitale, nua ch’il meins extraordinari dalla missiun ha entschiet sper il crap da batten, sco era ord il Jordan en Tiarasontga, nua che Jesus ei vegnius battegiaus. Duvrei quell’aua benedida sco regurdientscha graziusa vid Vies Batten!

Il rusari vegn dalla Tiarasontga, nua ch’el ei vegnius fabricaus a Betlehem entras famiglias basignusas. Urei era per nos frars e nossas soras ch’ein sco nus vegni battegiai e che vulan, malgrad difficultads, dar al Segner pascal la perdetga da lur cardientscha quotidiana en carezia. La carezia ed oravontut la carezia divina ha buca tiarms! Nossadunna drezza era oz ses egls sin nus.

Gie, mes cars, Ti ed jeu e nus tuts essan battegiai e tarmess en num dil Bab ed dil Fegl e dil Spert Sogn. Amen.

Diese Webseite verwendet Cookies, um Ihnen ein angenehmeres Surfen zu ermöglichen. Mehr lesen

Die Cookie-Einstellungen auf dieser Website sind auf "Cookies zulassen" eingestellt, um das beste Surferlebnis zu ermöglichen. Wenn du diese Website ohne Änderung der Cookie-Einstellungen verwendest oder auf "Akzeptieren" klickst, erklärst du sich damit einverstanden.

Schließen