Navi Button
Bistum Chur

Communablamein sin via alla renovaziun dalla Baselgia egl uestgiu da Cuera

Ord il communicau dalla 326avla conferenza plenara ordinaria dalla Conferenza Episcopala Svizra (CES) dils 2 – 4 da december 2019 a Lugano:

“Communablamein sin via alla renovaziun dalla Baselgia

A moda intensiva han ils uestgs svizzers discussiunau sur dil process ‘communablamein sin via alla renovaziun dalla Baselgia’. Oravontut las realitads variontas els differents uestgius e regiuns linguisticas ein ina gronda sfida per in proiect per l’entira Svizra. Perquei entscheiva il process sin palancau local, diocesan ed ellas regiuns linguisticas. Igl ei caussa dils uestgius d’instradar pass concrets.

La voluntad dad ir quella via communablamein cun tuts cartents dalla Svizra ei fermamein avon maun. Quei vala era per la formaziun d’ina gruppa empalonta. Il discuors cun ina persuna previda ha confirmau ch’ei dat el ravugl dalla CES quei che pertucca il cuntegn, differents aspects e che la tscherca per ina via communabla drova aunc empau temps. Igl ei era la via d’ina lutga communabla”.

Tenor la proposta dalla Conferenza Episcopala Svizra entscheiva la via alla renovaziun dalla Baselgia els singuls uestgius ed en lur pleivs e cuminonzas.

Suenter ver giu endamen el cussegl episcopal hai jeu decidiu che quella via duei succeder en treis fasas:

 

1.) Tedlar il plaid da Diu

Lein tedlar il plaid da Diu! Quella emprema fasa duei entscheiver els cors da tuts cartents! Nossas pleivs e cuminonzas ein envidadas da sviluppar iniziativas per envidar tuts da tedlar sin Diu e da survegnir aschia ina relaziun renovada cun Diu e sia Baselgia che nus essan gie. Quei duess saver schabegiar senza finanzas e structuras. Igl invit va a scadina persuna e famiglia, scadina pleiv e cuminonza. Ella sa vegnir vivida persunalmein ed immediat. En special ein era tuttas claustras en nies uestgiu envidadas dad esser sin quella via spirituala exempels vivents per tuts! Igl onn ecclesiastic 2019/2020 ein leutier in temps da grazia. El duei esser l’entschatta da quella via da renovaziun diocesana che meina al pugn culminont digl onn liturgic: Pastgas, la fiasta dalla levada da Cristus! “Preparei la via dil Segner! Fagei uliv las sendas per el!” (Mt 3,3). Naven dad oz san ins sin la pagina d’internet digl uestgiu da Cuera (www.bistum-chur.ch) anflar mintga di in’oraziun. Ella sa vegnir urada persunalmein ni da cuminonza. Jeu sperel che era la brev pastorala 2020 che vegn a cumparer sin l’emprema dumengia da Cureisma, duei esser sin quella via per nus tuts in agid. Lein seradunar per l’oraziun e per l’adoraziun. Lein urar Diu per l’assistenza da siu Sogn Spert, per che la Baselgia vegni renovada tras el!

 

2.) Tedlar in l’auter

Nus tedlein in l’auter! La secunda fasa vul gidar tuts a tedlar in l’auter ella glisch dil Sogn Spert. Sco ils cartents ein seradunai ell’emprema fasa (tochen Pastgas 2020) per l’oraziun, vegnan ussa instradadas novas iniziativas per formar gruppas da dialog en famiglias, pleivs e cuminonzas.

Ins savess duvrar leutier il niev document dalla conferenza episcopala svizra “…e Dieus ha plidau…” per sediscussiunar giudlunder. Era ils texts dil secund Concil vatican ein aunc adina e pli che zacu empalonts per la renovaziun dalla Baselgia. Nus s’udin tuts tier l’unica Baselgia ed essan uni cun ella en l’unica cardientscha!

Per in scomi pli profund e per la communicaziun communabla savess il niev uestg formar ina gruppa da coordinaziun. Quella secunda fasa sa aschia menar ad ina via da renovaziun dalla Baselgia egl uestgiu da Cuera ed en Svizra. Ella savess cuzzar tochen il temps d’Advent 2020. “Tarmetta tiu Spert e la fatscha dalla tiara serenovescha!”

 

3.) Lein seschar surprender

Lein seschar surprender! Quella tiarza fasa duei en sia fuorma concreta pil mument aunc esser aviarta. Pertgei sia fuorma dependa digl andament dallas empremas duas fasas. Neu dil temps savess quella tiarza fasa dalla via alla renovaziun egl uestgiu da Cuera ed en concordanza culs auters uestgius svizzers, cuzzar da 2020 tochen 2021. Possi il Sogn Spert, entras la renovaziun dils cors, provocar surpresas en sia Baselgia!

Cuera, la fiasta da Buania, ils 6 da schaner 2020

+ Peter Bürcher
Administratur apostolic digl uestgiu da Cuera

Diese Webseite verwendet Cookies, um Ihnen ein angenehmeres Surfen zu ermöglichen. Mehr lesen

Die Cookie-Einstellungen auf dieser Website sind auf "Cookies zulassen" eingestellt, um das beste Surferlebnis zu ermöglichen. Wenn du diese Website ohne Änderung der Cookie-Einstellungen verwendest oder auf "Akzeptieren" klickst, erklärst du sich damit einverstanden.

Schließen